• الرئيسية
  • قصة قصيرة
  • ادب عربى وعالمى
  • رجيم وصحة
  • سياسة الخصوصية
  • تواصل معنا
  • يلعن أبو ها اللجنة المتناصفة...

    الحلاّج جات نسبتو ضيفة حذاه...نسيبتي تكسر الراس بالحديث ...تتحدث ياسر باش في الأخر ما تفهم شيء كيف قناة 7...ما فهمتش تحبني نطلق بنتها و إلاّ تحبني نروّح من العشية بكري باش نتسمّى اللي انا نسيب باهي ...يعني صالح ببنتها و بالحكومة متاعنا اللي تحبنا نروحو باش نقعدو نتحدثو على كيفاش تطيب الملوخية باللحم البقري الصدرة و الرند وإلا بالكرشة باعتبار ان اللحم موش باهي و ما يبننش الملوخية كيف الكرشة...المهم نسيبتي شادة الصحيح اللي الملوخية تطيب باللحم و إلا بالكرشة ما ثمة واحدة في ها الدنيا هاذي يطيّبها خير من بناتها هي خاصة اللي خذيتها انا ...و االي هي أحسن طباخة في ها الدنيا...انا حد ما يكسرلي راسي كان نسيبتي و التلفزة متاع تونس..
    ماللا فدّه...جات المدام قالت لي اللي امها باش تعدي حذانا العشوية ....لاش يا رسول الله ...عشية السبت؟؟؟؟ ايا باهي ..مرحبا بيها...الله غالب انا عندي ما نعمل و يلزمني نخرج لوسط المدينة عندي برشة ما عملتش دوره من شهر رمضان .....فهمت المدام كل شيء..وحسبت روحي انا مه فهمت كعبة والو...خذيت التران و هبطت لقلب العاصمة..
    في الحقيقة ما عندي حتى موعد..اليوم انا حر طليق فقط حبيت نهرب من حديث نسيبتي...أية برّه نمشي كعبات بيرة و الباقي يعمل ليها دليل ...يعني لحد الساعة انا مواطن سعيد و راضي تقريبا على كل شيء إلا على نسيبتي و التلقزة الوطنية اللي كل ما نتفرج فيها نحس الدم خرجلي للراسي ..و ها الحكاية هذي شدت في راسي من النهار اللى الوالد الله يرحمو عطاني طريحة عل الخاطر ضحكت على خطاب الزعيم بورقيبة اللى و الله لحد الساعة ما زلت نعدي فيه بالكوكة ..خاصة من النهار الطريحة ..الوالد يعرف اللي من النهار اللي خرجت فرنسا من البلاد ما زادو حتى شيء .....بالعكس السكة متاخ التران اللى يهزّ للقيلاج متاعنا زاد تهلك و المدرسة اللي عندنا تبنت من عام 1918 يعني قبل الترجي و النادي الإفريفي في قرية ريفية نائية ومنسية.زادوها بعض اقسام ....واش بية كل ما نحكي على الفيلاج نتفكر بورقيبة و طريحة الوالد؟؟؟؟؟سامحوني..مشيت باش نعمل بيرات ..وفي عشية السبت...مشيت للحانة االي قلت ما نلقى فيها حتى حد نعرفو ...هبطت زوز بيرة و حطيت مجلة قدامي ...و اعملت كل طقوس المواطن السعيد االي تحكي القنوات و الجرايد الرسمية...
    ضرب التليفون ..آلو....آشكون معايا....؟؟؟؟؟
    - انا فلان ...عاسلامة ..
    - يسلمك...وينك..؟؟؟
    - هاني في لافيني..ندور ...قللي انت في وسط المدينة؟؟؟
    - ايه..لباس ؟؟
    - نحب نحكي معاك..في حاجة هامة...ربع ساعة ماأكثرش....
    نعالبو ها النهار هربت من نسيبتي ...باش نتفرهد ياخي جاني ها الهم...وكان قعدت حذا نسيبتي أحسن....
    - هاني في الحانة الفلانية في الداخل ...مرحبا بيك اتفضل.
    10 دقايق طل سي الشباب...ومعاه واحد من اصدقائي الباهيين اللي نحبهم برشة..؟؟؟ الله يقدر الخير....نعرفو ما يلوج عليّا كان وراه مصيبة
    ...السيد هذا كاتب العام متاع النقابة متاعنا اللي انا عضو فيها... وصاحب قايمة فبها ب 3 مقابل 4 ليه هو....ماك العام نكرهو على خاطر يحكي في شئ و يعمل في شئ آخر...عامل على وحهو رقعة ...يساسي و يطلب ...و يحب جمال ...و يكره العرب ..ويحكي على عصمت ...قيفارا..ومانديلا..و صندوق النقد الدولي...و السيستام المعوج...وحوايج اخري...وهو ما يفلت لا الطايرة و لا الحاطة...
    يا و الله ملا نهار؟؟؟
    -السلام عليكم
    -يا معلم هات كعبتين و زيدهم للحساب متاعي...هاو شويه لوز...موش مالح برشة ...ما تخافش كول ....
    قعد يخزللي ..و معاه صاحبي ..ومن بعد ما شرب الكاس الأول ...وكانو برىشارجي ...دخل في الموضوع طول..
    - اسمع صاحبي..برجولية باش نقلك حاجة و خوذها بالسريو ....
    - واشية...ان شالله خير ؟؟؟؟
    - اسحب الترشح متاعك لللجنة الإدارية المتناصفة....
    - علاش؟؟؟
    - على خاطر احنا كنقابة قررنا انو فلان و فلان هوما فقط باش يترشحو.....وانتا يلزمك باش تسحب خير ....
    - آه..انتو كنقابة اخترتو آش يكون باش يترشح....آخي انا عضو معاكم و إلا لا..؟؟؟
    - إيه ..انت معانا ..ما شاورناكش على خاطر احنا الأغلبية 4/3 قررنا وما عليك إلا الإلتزام...بقرار الأغلبية
    - باهي انتم الأغلبية ..شاورتوني في الحكاية؟؟؟؟
    - لا
    - حتى نا بالحرام لا سحبت ترشحي كي نبقى وحدي....
    - ماني نعرفك راسك صحيح ...و ما تفيق ..كان يضرب راسك عل الحيط....
    - كملت الحكاية متاعك....؟؟؟؟؟
    - آش قلت باش تسحب وإلا لا؟؟؟؟
    - ماني قتلك لا....راني جاي من كار الحدّ..يعني من وراء البلايك....آزححححح...حتى كومسيون باريتار ...تحبو فيها سرقة و تدليس و أسماء ناجحة بالمسبّق...آش خليتو لينا فب ها البلاد....يا سيدي بالحرام كي يقوم الشايب من القبر و يقللي اسحب ...لا سحبتها... يا شاف ...آش عندي؟؟؟؟
    قام سي وخيّنا و الشرر يتطاير من عنيه....وراهو يسب في في قلبو ...سي الكاتب العام يحب ديمقراطية على المقاس...و نقابة متاع نعاج..وجماعة علالش...
    توّة عرفت اللي يحب ما نترشحش .....لأنو كل ترشح ..يعتبر تمرد على حضرتو....
    يا سي الحلاج موش كان قعدت حذى نسيبتك خير؟؟؟؟؟
    آية حضر روحك من جديد ...الجماعة موش باش يخلوك تنجح...في ها المصيبة متاع الكوميسيون المحنونة....
    وتوّة كان سحبت يا ويل و كان قعدت يا ويل......اية حضّر روحك ...لنهار الإنتخاب و ادخل فيها فرنتسي و حاشاكم بول عليها...اللى باش يصير يصير ....و كان نسحب تاو يقول خوّاف و تزيد تسمع نسيبتي ...؟؟؟ تي بالحرام لا رجعت ...وقتاش الإنتخابات ..13 نوفمبر..موش متاع آوباما ...متاع ها المتناصفة اللى ما فيها حتى تناصف كان الإسم...اما هاو باش نحكيلكم علاش سي الفرادي الكاتب العام يحب يحط جماعتو فيها....
    يتبع........يتبع.......يتبع.........

    التعليقات
    1 التعليقات

    مدون بلوجر

    المشاركات الشائعة