• الرئيسية
  • قصة قصيرة
  • ادب عربى وعالمى
  • رجيم وصحة
  • سياسة الخصوصية
  • تواصل معنا
  • يلعن بو..... ها اللحنة المتناصفة.....

    علاش يحب خونا الكاتب العام باش يحط جماعتو في اللجنة؟؟؟؟ على خاطر يحب يرجع يلعب في التيك و تاكْ مع الإدارة العامة للمؤسسة..يعني هو يعدي جماعتو في قائمة الإرتقاء في الدرجة او الصنف المهني و كذلك الإدارة تعدي القفافة متاعها في نفس الحالة...هذا من ناحية من ناحية أخرى يحب يقول اللى هو الوحيد اللي قادر يحط قائمة في الكوميسيون وفي النقابة و كان لزم في الشعبة وتنجح كاملة ...يعني هو الفاتق الناطق .. و في الآخر وهذا هو الهام انو في حالات مجالس التأديب آش يتم بالضبط؟؟؟
    - أولا: يختارو عون او إطار " كادر" ما عندو حد و ماهوش من القائمتين سواء متاع الإدارة و إلا متاع الكاتب العام ....
    - اثنين : تلبس الإدارة العامة رداء العـفّــة و الإنضباط و الضرب على آيادي " العابثين" و تخطف واحد من الزواولة و تطلبلو مجلس تأديب ...
    - ثلاثة : ينعقد مجلس التأديب و تقع عقوبة المعني بالأمر في العادة بفترة تتراوح ما بين 15 يوم الى 3 أشهر حسب التقرير الإداري وخطورة الخظأ الذي ارتكبه العون....
    - أربعة : يتدخّل الأخ الكاتب العام لدى السيّد المدير العام للمؤسسة و يقع حذف نصف العقوبة أو حتى ثلثيها ....
    - خمسة : يهبط الكاتب العام للنقابة للأعوان ليقول ان تدخّله أثمر عن تخفيف العقوبة الى النصف او الثلثين ...وان السيد المدير العام رجل متفهّم و ولد عائلة و يسخف على الأعوان حتى الغالطين وكل مرّة يطيّح في العقوبة اللى أقرّها مجلس التأديب سوا بالإجماع او بالخلاف....
    في الواقع هي خطة بائسة و جهنمية...خطة يخرج منها العون او الإطار المعاقب فرحا مسرورا بنتيجة الحطّ من العقوبة ..يعني سلّكها...
    وجات جلدية و خفّافي....وينال الأخ الكاتب العام كل الشكر و المدح و الثناء من الأعوان و الإطارات....هذا علاش يحب يكون موجود بالجماعة متاعو في اللجنة المتناصفة ....يعني واحد يحلب و واحد يشدّ المحْلب.....
    لكن و لحسن الحظ، في الفترة اللي فاتت مجموعة أخرى في اللجنة بما فيهم العبدلله ..فاهمين اللعبة ...و عارفين الخطة...و نعرفو ملعب الإدارة ...ومؤامرات الكاتب العام...شئ ما يتعدّى....كل خطوة بحسابها...و كل بصّة بوضوها...
    جاء النهار اللي باش نعملو جلسة في ما يخص ترقيات الأصناف و السلالم Echelons et catégories بدينا الجلسة عطانا سي المدير المالي و الإداري DAF قائمة محبوكة بالأسماء مع ضحكة صفراء.... وقال يا جماعة اللي عندو ما يقول واللى اسمو موش موجود ما يسالش نلحقوه للقائمة مع كل الإعتذار للسهو او النسيان ان وجد....باهي الراجل يحب يورّطنا و يوخذ علينا الهف...ومن بعد ما نبلعو حربوشة الطمع يوللي يعمل اللي يحب....رئيس اللجنة الأدارية المتناصفة راجل كبير في السنّ و بيني وبينكم زوّالي و متربّي برشة ..بحيث ولّى رئيس اللجنة المتناصفة المدير المالي و الإداري موش خونا ....
    من بعد ما كمّل الخطبة متاعو وحكاية التعب اللي يقاسي فيه والخدمة النظيفة اللى يحب يعملها في الإدارة و الأعوان اللى مقلقينو بقلة الخدمة و التكركير...ما نساش باش يقول اللي السيد المدير العام للمؤسسة اللي يحب الأعوان مستدعينا لفطور قمقوم في مطعم مشهور في حلق الواد ...
    و باعتبار انو كريم برشة قاللي اللي يحب يشرب يشرب على روحو اما بربّي اللي باش يشرب بيرّة و إلاّ شراب ما يرجعش للخدمة على خاطر كيما تعرفو ممنوع ...روّحو و ما شافكم حتّى حدّ...انا والله كان ماجاش عندي خدمة ياسر تستنى فية ..راني حتى انا عملت معاكم ضربات ..عندي برشة ما شربتش ..من الصيف .....من عرس بنت صاحبي ...ماو يا سي فلان ؟؟؟؟ يقصد في رئيس اللحنة المتناصفة... ايه تفضلو صححولنا في القائمة و اقصدو ربي على بكري....

    كلام عسل صافي يقول فيه السيد المدير المالي و الإداري...خذينا القايمة نلقوها ملغّمة ...فيها الصاحبة و الصاحب و فيها اللى في 5 سنين ماخذ مرتين و ثلاثة و فيها القواّدة متاع الشعبة و متاع الكاتب العام ومتاع الإدارة ...لأنو اللى يعجبك أنو الثلاثة ما عندهمش ثقة في بعضهم
    ......خممت شوية وقلت للمدير ...انت ماكش من المعيّنين او المنتخبيين و وجود سيادتك معانا يخل بمبدإ التناصف وهو أحد شروط قانونية الجلسة ...عاد ارجو من سيادة رئيس اللجنة انو يصحح ها الوضعية .....ما زلت ما كملتش و السيد المدير قام من بلاصتو و قال هيا ربي يعينكم اخدمو على رواحكم....
    هو خرج من القاعة ...ورئيس اللجنة خزرلي و قاللي موش ترى اللي احرجت الراجل...عيب عليك ...الساعة هو ناس طيبة و يحب يعاوننا
    - أنا متمسك بالتناصف ....و اللي عملتو انا كارك راك عملتو انت...تي يحب ينحيلك الرئاسة...اشبيك انت ماكش قد المقام ...تبارك الله عليك مالي بلاصتك...اللهم .....وسكتت.
    - هيا ..هيا صححولنا وهيا نقصدو ربي ما نتطولهاش وهي قصيرة....قال واحد من المعينين
    - تكلم الزميل اللي معايا و قال آشكون قال اللي المعطيات هذي صحيحة ؟؟؟
    - يعطيك الصحة قلت لو.. ياخويا نعلقو القايمة ونفتحو باب الإعتراضات ومن بعد بالنهرات نعملو جلسة و نشوفو شرعية الإعتراضات و نبتو فيها بالسلب او الإيجاب....
    - آشنوه يا سي الحلاج باش تحل علينا حبارة متاع جوابات...وشكايات...ها الوضعية كنا نحلوها في نصف ساعة ...انت تحبها تتحل في شهر و شوف وشوف ؟؟؟
    - انا و الإخوة المنتخبين متمسكين براينا...لأنو للأسف ما عندناش ثقة في معطيات الإدارة ...واحنا جينا باش نصلحو ...موش باش نخلوها........تقلبت الجلسة و مساط الفطور ...وسخن الجوّ متاع النقاش..و في الآخر قرّرنا تعليق القوائم و فتحنا 10 أيام للإعتراض ...
    يتبع.............يتبع.............


    التعليقات
    0 التعليقات

    مدون بلوجر

    المشاركات الشائعة